وقت اللي ما عاد عندك ما تخسر، تفهمها اللعبة.
وقت اللي ما عاد عندك ما تخسر، تتلفت للي كان مخوفك و تشلق اللي ما عندو حتى أهمية. مناش خايف؟؟؟ التمرميد؟؟؟ ما يقتلش. الحزن؟؟؟ هاك جيت فيه، و طلع ما يقتلش. المرارة؟؟؟ مطعم كيف غيرو ع اللسان.
موش كيف اللي يحكي « ما عاد عندو ما يخسر » كيف اللي ما عاد عندو ما يخسر. فرق. فرق كبييييييييييييييييييير ياسر.
اللي يحكي « ما عاد عندو ما يخسر » يهمو أنو الناس تعرف و تاخو عليه صورة اللي هو ما عاد عندو ما يخسر، على خاطرو ياسر شجاع، ولا على خاطرو وليدها و باعثها، ولا على خاطرو ياسر خسر مسكين. اللي يحكي « ما عاد عندو ما يخسر » يلوج على انفعال من عند اللي حكالو. بينما الانسان اللي ما عاد عندو ما يخسر، ما على بالو فاقو بيه ولا ما فاقوش : ماهمش في عالمو و ماهوش في عالمهم. اللي ما عاد عندو ما يخسر حاسب الناس و آش باش يقولو عليه كجزء م الحاجات اللي تخسرو سيديجا. و كي تخسر حكاية، ماعادش تهتملها جملة. شجاع، جبان، ميبون، فحل، راس لمبوط، بعبوص لمبوط، تريليا بالفڨاع كلها كي بعضها.
وقت اللي ما عاد عندك ما تخسر، توضاح الرؤيا. كل شي براني خسرتو. ما قعدتلك كان ذاتك.
فاش قام حياتك، كان تكمل تخسرها هي زادة؟؟؟
وقت اللي بالحق، ما عاد عندك ما تخسر، فجأة تشلق : ما خسرت شي. باللي صار، و مازلت حي. و مازلت تحب تعيش. و مازلت تعرف اللي فما حكاية لازم تتعمل و لازمك انت تعملها. خسرت اللي كان ماشي في بالك يسوى و ما تصيرش عيشة بلا بيه. أما الشمس طلعت، أقوى منك و م اللي قدستلو لدرجة اللي كي مشا عليك حسيت نفسك خسرت. فجأة تشلق : انت حاجة أخرى غير اللي عندك، كأشياء مادية و معنوية.
كي تذوق انواعهم الكل، و تلقى روحك ما عاد عندك ما تخسر، موش تحب توهم غيرك اللي انت « إله المعاناة سوفرانس الدين »، فجأة تاقف قدامك حقيقة مزيانة، تلصف تقول حجرة تيمم مبلولة تحت شمس أوسو : ما بقا قدامك كان الربح.
اللي قابل يتخسر و خسرتو. و قعدت الذات، تتنفس ديراكت عريانة.
اخسر كل شي يبانلك مهم، في مخك، و اسئل روحك « تقعد حي ولا لا » موش « تحب تقعد حي ولا لا ». ما تعرفش على روحك توة آش تحب مبعد، من غير ما تتعلط و تسئل.
و ديما تفكر : اللي قابل يتخسر، ما يستاهلش تتعطالو أهمية، مهما كان حديث الناس و المجتمع. اللي قابل يتخسر موش مولود معاك و ليك. ما ليك كان نفسك، و الرحلة اللي تعديها معاها.
كي تلقى روحك ما عاد عندك ما تخسر، أفرح : وقتها يبدى الربح.