عام على باردو.
تلامت الحريات. في بلاد، لا تنجم تصلي مرتاح، ولا تنجم تزبرط مرتاح، قاموا الخبراء يوجهو في التهمة للـ »حريات ». في بلاد تتحاسب على كلمة تقولها لعون تنفيذ و ما تعجبوش. في بلاد تنجم تختفي ستة نهارات ما تشوف حد و ما يشوفك حد، و من بوشوشة للجيول للحبس، تلامت الحريات.
هاكم تراو فيها الحريات، على كل لون يا كريمة، ملوحة مبعزقة في الشارع، ناصبين بيها في باب دزيرة.
على ما عبينا منها بزايد، الصيف اللي فات وصلو الخبراء يتساءلوا إذا كان زعمة نشوفو كيفاه ننقصو م الحريات، بالك نربحو شوية أمن.
ياخي تلامت حقوق الإنسان. في بلاد عادي تتلفت تلقى روحك مدڨدڨ و ضلوعك مكسرة على خاطر « الله غالب »، تلامو حقوق الإنسان. في بلاد مازال اغلب عبادها عايشين تحت الصفر الحقوقي (فقر، تهميش، غياب التكافؤ و المساواة بين الجنسين و في نفس الجنس)، الخبراء اعتبروا انو حقوق الانسان المسيبة كي الما ع البطيخ هي اللي عملت الارهاب. شبيك، رانا وصلنا يجيونا لاجئين سياسيين من أماريكيا و هولاندا و النرويج، اللي يقلك. معروفة تونس بحقوق الانسان. انت آقف في أي بلاصة في العالم، أي رونپوان، غير اسئل على « حقوق الإنسان » آتو ينعتوك على تونس طول.
أحنا هكاكة ما عناش، و زدنا نقصنا منهم ها الحقوق. هو كي تجي تشوف الحق، قوانيننا تبارك الله، مسبقة الخير على حساب عشرة.
تقول انت، فما شكون تقلق كيف تشدو حضبة عباد، لا علاقة، و قعدو ياكل فيهم ضرب في الڨرجاني، و مبعد كي ما ثبتو عليهم شي، و بعد ما تحطمو، لوحوهم؟؟؟
تقول انت، فما شكون تقلق كيفاه لتوة حتى لجنة من اللجان اللي تعملت ما خرجت تقرير ولا خدمت خدمة؟؟؟
لا يا ولدي، قيد على حقوق الإنسان، و كان ما لقيتهاش قيد ع « الحكوكيين ».
لوغة جديدة، موش من عند الخبراء المرة هاذي. من عند اللي ولاو طالبين الشماتة، كيف الرومان العطاشى لموتى في الحلبة. الخوف يعطش العينين، تولي تتروى بالدم. معروف المرض.
عام تعدى على باردو، و على ما تعلمنا الدرس، سوسة، محمد الخامس لوين خلط الضرب لبنڨردان و محاولة إقامة سلطة بديلة.
في الأثناء، مبروك السلطاني و الڨصرين.
في الأثناء، « هيا نرجعو كيما كنا أمان » ولات سياسة دولة.
و قيد ع « الحكوكيين ».

المجد للشهيد الكلب، ولا هو الكلب الشهيد. ما نعرفش كيفاه تسميوه في بلادكم.

آهوكا مع الضحايا، في الموزاييك.

السيد يخلص م المال العمومي (فلوسي و فلوسك في الأساس، و لو أنا محتحتين)، دراقداه من مليون في الشهر، زيدها منح، زيدها إيسونس و فلوس في التليفون و بونوات، جوست باش يخدم « ناطق رسمي ». معناها خدمتو الكلمة و حسابها، و كي يتحرك يعبر على « موقف » رسمي، فيه مينيموم متع المشترك.
لحد الآن، السيد هذا لا يزي موش يخدم في خدمتو، لا يزي وين يحل شواربو، يخرج كلمات تحاول تربط مع ماضي قطعنا معاه.
أيه نعم، سايي قطعنا مع بن علي.
قطعنا مع التبرويل و « اسكت برك، هاو 5000 خدمة ».
قطعنا مع منطق « برة برك، خوك الكبير و يعرف آش يعمل ». الحاكم ماهوش خونا الكبير، و الحاكم بالبروفة ما يعرفش آش يعمل. و الدليل شوكات ناطق رسمي.
قطعنا مع المسمار المصدد، متع « انا نقول و انت اضرب راسك ع الحيط ».
قطعنا مع منطق « انا أو الفراغ » و « انا أو الإرهاب ». الفراغ و جانا و عبيناه. الإرهاب و جربناه، و تبارك الله هاكم تراو، الدعشوش نكردوه بالحجر، المواطنين قبل الأعوان.
قطعنا مرة و إلى الأبد مع التحثويل كتمشي رسمي مشترك. حتى لو كان السياسيين و الفراشط مازال ما فيبالهمش، تو يولي فيبالهم.
قطعنا و تعدينا لزمان آخر، مازلنا نستحملو فيه بهامة الڨدم و تكركيرهم من باب الرفق بالحيوان. أما موش الكل مستعدين نستحملوهم.
حاجة كيف خالد شوكات ما عادش عندها محل م الإعراب في المشترك، ع الأقل حاليا. من حقو يتوحش بن علي كيما يحب، أما في مقال يهبطو في الشروق في « بريد القراء »، ولا في رسالة لـ »أخي عاطف » في الإعلان، موش كيف يبدا ناطق رسمي. مش بفلوسنا.
استقالة، إقالة، كونجي ماتيرنيتي، طرد تعسفي، فرز أمني، يتصرفو، أما السيد هذا وصل لدرجة اللي خلا الواحد يتوحش عدنان منصر و يتحسر ع البكوش كي كان ناطق رسمي.
أصدقائي الشانعين، صديقاتي الشانعات، فرد كلمة : ترت شوكات.