اليوم نحب نعرفكم على كائن عجيب. ترعرع في جبال الكاف، و جوانحو كي يتحلو يوساعها الكل، من أطرف الارض لأطرف الكون. كائن التيسو العجيب عندو رياضة يمارسها بجمال : الطريزة. كل شي مطروز بالعين : كولاج ولا سينما، تصوير ولا دهينة ولا طريزة. كي العزوزة النڨرازة، مطبسة ع الإبرة و الخيط، تمنقش في اللي شافتو في راسها و تطرز الارواح خيوط و اشكال و الوان.
كائن التيسو حط عينيه ع المدينة. أي مدينة، كل مدينة، مدينة الشوارع اللي ناسها قطعة من سيمانها. و الطريزة باش تبدا تتعرض من نهار 6 مارس، عند عايشة الڨرجي في سيدي بوسعيد. ننصحكم تمشيو تعملو بانو لعينيكم. شوية جمال ما فيه باس، سيرتو كي يبدا عندو ما يحكي.
هاذي الآفيش متع الڢيرنيساج :

و هاذي وحدة من أكثر اللوحات اللي عجبوني في حياتي ، لانتصار بلعيد (كائن التيسو المذكور أعلاه) :

آه، أيه قبل ما ننسا، كل وين تواتيكم فرصة باش تتفرجو في « نڨيش ربيع« ، ما تراتوهاش