بيانات رسميّة من جمهوريّة ثعلبان -تحديث-

في الأساس هو نصّ، مكتوب على ميزان قصيدة متع الفاجومي، أحمد فؤاد نجم، تم إلقاؤو في تظاهرو ستريت بويتري في رمضان 2012. مع تغيّر الوضع من وقتها، فمّا بيان رابع لازم، و تحديث للبيان الموازي.

بيان رقم واحد جمهوريّة ثعلبان

هنا الأقحوان
بلاد الأمان
طفولة و رجولة و شباب و ذبّان
و فرحة كبيرة 
بكلّ انجازات
قناطر ، بياطر ، طراطر
بكلّ توالات
ما عندك ما تشكي
ما عندك ما تلوم ،
ما فمّا حدّ مرسكي
ما فمّاش هموم
و فمّا حثالة
كريهة و دنيئة 
تحبّ العمالة
بلادكم منهم بريئة
لكن ما تخافوش
يا شعبي يا وعدي يا أحلى الغنم
يا عبد القروش
الرّئيس
و البوليس
لاهين ، في خاطركم ، بها الحفتروش
بيان رقم اثنين ، جمهوريّة ثعلبان

هنا ثورستان
ثورتنا المجيدة 
الحبيبة العتيدة
خلاّت البلاد في الصّدارة
في علم الحضارة
و عطينا الدّروس
ضحّينا بنفوس
و طرّدنا الأقحوان
و خلعنا المخلوع
و قضينا ع الجوع ،
بصدرنا العريان
و الكلّ مع بعضنا 
حقّقنا الكثير 
لا قعدت مصايب
لا قعد تجوبير
لكن فمّا بعض اللّذي يفسدون
ما يهمّش لبلاد
تتحرق ولاّ تهون
طالبين اقتحام
و انتقام
همّال و فصايل
عايشين بلا نظام
طالبين استقالة
و خدم للبطّالة
لكن ما تخافوش
يا شعبي يا وعدي يا أحلى الكباش
يا أعتد جيوش
البوليس
و الرّئيس
و الجنرال
حطّو اليدّ في المال
و حلفوا عليهم بأشدّ الدّمار

بيان رقم ثلاثة ، جمهوريّة ثعلبان

هنا الأردوغان
بلاد الزّمان
أتتنا الخلافة
على كلّ آفة
سكبنا البانان
و كلّو بشرع ربّي
حلال في حلال
كلّو بانخراطو
حتّى م ال poubelle
و جبنا لهاذي البلاد النّمو و الحنان
معامل ، مكاحل ، مناول
ترسكل ، تهيّأ ، تهيكل
في كلّ قوّاد و كلّ طحّان
شوفو الكفاءات
قطعنا الرّباط
و انتخابات
فسّخنا القديم ، و النّظافة تولّات
سامحنا اللّي تاب و قيّد على الإنخراط : 
« نهضتي إنّني في ثبات »
غير فمّا حثالة
ندّالها الجبين
تحبّ العمالة
و تكره الدّين
لكن ما تخافوش
يا شعبي يا لعبي يا أسمن شياه
يا أرقى كروش
الرّئيس
و البوليس
و الجنرال
و المجاهد
عاسّين ع الوحوش
و كيف ما جهنّم تعبّي الحطب 
عنّا بوشوشة ، تعبّي الشّباب
بيان رقم أربعة، جمهوريّة ثعلبان

هنا كربلان
بلاد الحنان
بلاد الكفاءة
شهايد، قصايد، و كلام في الجرايد
و غزّل زيد موت
وزيرنا أمير
رئيسنا مدير
يدوّر بصبعو جميع الأمم
هنا كربلان
بلاد اللّسان
نبوّش، نصالح
صهيون و خنوج
 لأجل المصالح
أقحواننا يعود
و يعود الأمان
لنفس المكان
عاداتنا ثقافة
أصالة و طرافة
و أقدم تقاليدنا سنصون
هنا كربلان
بلاد الراي بان
و مريول سي مهدي، و غزرة آمال
أمورنا مسّوسة، و خدمتنا عال
حديثنا مطوّل
و كلّو فراغ
و كلّو مسهّل
تخدير للدّماغ
حقّقنا الكثير
من حتّ شيّ، لحتّ شيّ
و مخطّطنا كبير
باش نزيدو الـ »حتّ شيّ »
و نخلّو البلاد أقحبان
بلاد السّياحة
صناعة و فلاحة
لكن فمّا علّة
مقيتة و كريهة
ما ترشفش بلّة
م الجّرحى لنزيهة*
أقعار ثورجوت
ماهيش حابّة تفهم
أنّو الوقت فات
ماهيش حابّة تقبل
نهاية الحياة
تغرّد
تحاول تهرّد
ماهيش حابّة تبرد
هاو حقّ الشّهيد، هاو ندرا اش يقولو
و قضايا كبيرة
باش ترمينا في حيرة
لكن ما تخافوش
يا شعبي، يا لعبي، يا أخوف علّوش
الرّئيس
و البوليس
و الجنرال
و المدير
و المجاهد
و الطّرحان
عليهم يعسّوا
يجسّوا، يدسّوا
و عنّا حبوسات
و عنّا الباقات
تخبّي، تعبّي، تحمّل، تهمّل، توصّل
بالواحد بالواحد
و نملا المراكز
نوسّع محابس
و تحيا السّياحة

بيان موازي إلى جمهوريّة ثعلبان

هنا الحثالة
بقايا الشّباب
إلى ثعلبان
و أرض البنان
لا تفرح ، لا تزهى
لا تقول جهدي ولاّ
أنا كي تولدت
تولدت لسبب : 
تلميد الغضب
ليوم الحساب
لذلك ،ما يخلطلي ضربك
و حرّا أسير إلى قلب حبسك
إنت تحكم عباد
و احنا نبنو بلاد
غير ما تنساش كلامي السّفيه
ما تعمل ، كان اللّي تقدر عليه
و ماكش قادر أكثر م اللّي قبلك
ماكش قادر أكثر م اللّي بعدك
و اللّي وصّلك للّي انت فيه
أو في كلمة أخرى : تو تخرولنا فيه
* نزيهة رجيبة

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *