تونس تحبك

(مقتطف من الكراسة)
تونس تحبك.
محبة العربي الماطري لسحر الطفولة، محبة سهام بلخوجة للكرامة، محبة أبو عياض لحرية أهل قريش، محبة الترجي للإفريقي
تونس تحبك. محبة الخطوط الجوية للمواعيد، محبة معمل الكيماوي للڨوابسية، محبة الفسفاط للسنين البيضا الصافية، محبة الزيتون للنساء الفلاحات، محبة الحاكم لبدنك، محبة السلطة لمهدي حواص و مهدي جمعة و مهدي بن غربية و من أيام عبيد الله للمهدي المنتظر.
تونس تحبك تنتظر.
فانتظر ؛ على كرسي في كياس، على حجرة في جنينة، على قلبك في كولوار السبيطار، على ڨاجو بيرة في الجبانة، على المزفت في محطة كيران يتعدى منها الذبان ساعة ساعة.
تونس تحبك، محبة البو اللي يكسر يدين ولدو ضرب على خاطرو ما جاش الاول، ولا جا الأول بأقل من 25 على 20، محبة الراجل اللي يشفّر في صاحبتو على خاطرها لازم تفهم.
تونس تحبك. هذاكة علاه لازمك تموت عليها. مش تحتها، حتى في القبر ترابها رزين و الميترو بهاك الحسبة. مش بحذاها (عندها شكون و ماهوش انت). مش ع الاجناب، ما فماش بلاصة.
تونس خازوق، لازمك تموت عليها. تونس تحبك.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *