المهم تعيش

و برا تنحتلك بزولة ؟؟؟ انت أغلى، أعلى و أحلى من « كعبتين خير من كعبة ». و اللي باش « يتقزز » أعرفيه راهو موش ذكر ولا أنثى، جرد هجين معفط تسلكها كي ما تعرفوش.
المهم تعيش، و الشمس اللي ساطعة من صدرك تقعد ترمي شعاعها عليك و ع اللي محاوطين بيك.
البدن ما يهونش، نعرف. كل قطعة فيه ما تهونش، صحيح. و زادة الدنيا ما توفاش لغادي. الدنيا توفا وقت اللي انت توفيها. و البزولة على قد ماهي باهية و غالية، ماهيش الدنيا، هي مجرد قطعة منها. بالنسبة لبرشة ناس، و انا منهم، حضورك هو الدنيا بما فيها.
نعرفك مليح، عشيرتي. نعرف اللي في حلقك غصة، و نسمع فيها التنهيدة الغارقة اللي تسرح بيك للنوم. قطعة من لحمك باش تطير. أما الله غالب، تطير القطعة ولا نتشواو فيك، عيلتك و احبابك و اصحابك.
النفس بدن زادة، بدن من نوع آخر. و انت تعرف و انا نعرف ياسر ناس ضاربها أكثر م السرطان في نفوسها. بزولة نفسها مقطوعة، قلب نفسها مخثر مجلوط، ساقين نفسها ضاربها النقرس و كي الفيل المحرشف. و فرحانة بمرضها.
و انت، عشيرة عمري، بدن نفسك صحيح، سپورتيف ممسكل، مكون مليح، قوي و متغذي على قاعدة. ما لازم يتمس فيه شي جرة قطعة لحم فسادها أكثر من صلاحها.
كي كنا صغار، كانت بزازلنا كيف كيف، تتفكر ؟؟؟ توة نرجعو للشطر كي وقتها. نصف خطوة نحو الطفولة 🙂
أيه نعرف اللي « باسلة »، أما صحيحة كومام، أوشي؟؟؟ 🙂
أي واحد ينقص غرام من غزرتو ليك بعد ما تروح م الكلينيك، ما استاهلش يعرفك. حتى انت كان تعملها.
ماكش وحدك، عشيرتي. و قيمتك من بدن نفسك و فعلك. كل حاجة تصير نتعاملو معاها بلا « مآسي »، Accomoder et s’adapter هكة تربينا، تتفكر؟؟ و اللي يصير نلقفوه ضحكة. ما أقوى منا كان الموت عشيرتي. خلينا بعاد عليها، ببزولة ولا بلاش.
مانيش باش نڨرع و لا بش نبدل تصويرة « تضامنا » معاك. ما عنديش علاه نتضامن مع إنسان مكتمل و قائم الذات كيفي كيفو. ننجم نحبك ولا نتلاكش معاك، فقط.

zyza

Un commentaire sur “المهم تعيش

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *